Монгол Улсын төрөөс газрын бодлого, удирдлагын шинэтгэлийн хүрээнд түүхэнд анх удаа иргэддээ үнэ төлбөргүй газар өмчлүүлэх “Монгол улсын иргэнд газар өмчлүүлэх тухай хууль” 2003 оны 05 дугаар сарын 01-ний өдрөөс  хэрэгжиж эхэлснээс хойш өнөөг хүртэл аймгийн хэмжээнд үнэ төлбөргүйгээр  гэр бүлийн хэрэгцээний зориулалтаар шинээр 19666 иргэнд  3157,48 га газрыг  өмчлүүлээд байгаа бөгөөд аймгийн Иргэдийн Төлөөлөгчдийн Хурлын ээлжит 12 дугаар хуралдаанаар иргэнд эзэмшиж байгаа хашааны газрыг үнэгүй өмчлүүлэх газрын байршил, хэмжээ, иргэнд 2020 онд өмчлүүлэх газрын нийт хэмжээ, байршил, зориулалтыг тус тус баталлаа. /2019.11.04/

          Аймгийн хэмжээнд 2020 онд иргэнд өмчлүүлэх газрын нийт хэмжээ, байршил, зориулалтыг хууль тогтоомжийн хүрээнд зохион байгуулахыг аймгийн Засаг дарга Т.Энхтүвшинд үүрэг болгов.

          Дээрх газар өмчилж авсан иргэдийн тоог аймгийн нийт иргэдийн тоотой харьцуулбал хүн амын 28 хувь нь газраа өмчилж авсан байна.

          2020 онд гэр бүлийн хэрэгцээний зориулалтаар шинээр 71,2122 га газрыг 533 иргэнд, эзэмшиж байгаа хашааны 4,8026 га газрыг 73 иргэнд үнэ төлбөргүйгээр өмчлүүлэх юм.