Дорноговь аймгийн нийт иргэд, шилжин суурьших сонирхолтой иргэн, аж ахуйн нэгжүүдэд аймгийн онцлог, давуу тал, өнөөгийн байдал, ирээдүйн хөгжил, бизнесийн боломжийг танилцуулан мэдээлэх, иргэд, аж ахуйн нэгжийн сонирхсон асуултад хариулт өгч Дорноговь аймгийн талаарх цогц мэдээллээр хангах зорилго бүхий “Нээлттэй Дорноговь” чуулганыг аймгийн ИТХ-ын дарга Б.Ганзориг нээж үг хэллээ.

Тэрээр хэлсэн үгэндээ:

"Дорноговь аймаг нь авто зам, төмөр зам зэрэг дэд бүтцийн давуу байдалдаа түшиглэн Монгол Улсын эдийн засгийн хөгжлийг тодорхойлох аж үйлдвэрийн томоохон бүс нутаг болон хөгжиж байгаа бөгөөд үүний үр дүнд өрсөлдөх чадварын үнэлгээгээр Монгол Улсдаа сүүлийн хоёр жил дараалан тэргүүлсэн амжилтыг дурдахад таатай байна.

Шинэ сэргэлтийн бодлогын “Хот, хөдөөгийн сэргэлт” зорилтыг хэрэгжүүлэх ажлын хүрээнд Улаанбаатар хотоос шилжин суурьших иргэд, аж ахуйн нэгж байгууллагуудыг дэмжих, шаардлагатай зохих бэлтгэлийг хангах зорилгоор аймгийн ИТХ-аар “Нээлттэй Дорноговь аймаг” хөтөлбөрийг батлан 14 мянга орчим иргэнийг орон нутагтаа шилжүүлэн суурьшуулахаар төлөвлөж, 2023 оныг “Нээлттэй Дорноговь” зорилтот жил болгон зарлаад байна.

Тус аймагт үндэсний болоод улс, орон нутгийн түүхэн бүтээн байгуулалтын ажлууд өрнөж орон нутгийн хөгжил хурдацтай урагшилж, аж үйлдвэрийн цогцолбор үйлдвэр байгуулагдахын зэрэгцээ орон нутгийн төсвийн хөрөнгө оруулалтаар бүтээн байгуулалтын ажлууд үргэлжилж байгаа бөгөөд цаашид Дорноговь аймагт шинэ суурьшлын бүс болон дэд бүтцийг хөгжүүлэхтэй уялдуулан аж үйлдвэржсэн хотын хэрэгцээ шаардлагыг хангах шинээр үйлдвэрлэл үйлчилгээг нэмэгдүүлэх, нийгэм соёл, аялал жуулчлал, хөдөө аж ахуйн бизнес эрхлэх бүрэн боломж байгааг дуулгахад таатай байна." гэв.

Чуулганд Монгол Улсын Их Хурлын гишүүд, хөдөөгийн сэргэлтийн бодлогыг хэрэгжүүлэх Засгийн газрын төв ажлын хэсгийн дарга, гишүүд, төрийн захиргааны төв байгууллагын албаны хүмүүс, БНХАУ, ОХУ, Энэтхэг улсын зочид төлөөлөгчид, Дорноговь аймагт үйл ажиллагаа явуулдаг компанийн төлөөллүүд, Дорноговь аймгийн ард иргэд нийт 1000 гаруй хүн оролцож байгаараа онцлог байна.

Мөн чуулганы хүрээнд “Хөрөнгө оруулалт, бүтээн байгуулалт”, “Ажлын байр, бизнес боломж” сэдвээр салбар хуралдаануудыг зохион байгуулж Дорноговь аймгийн хөгжил цэцэглэлт, хөгжлийн загварын талаар зочин панелистуудтай харилцан ярилцаж шийдэлд хүрэх юм.