Өнөөдөр /2023.06.01/ "Олон Улсын Хүүхдийн эрхийг хамгаалах өдөр"-ийн баярын ёслолын үйл ажиллагааг нээн аймгийн ИТХ-ын дарга Б.Ганзориг мэндчилгээ дэвшүүллээ.

Энэ үеэр Гэмт хэрэг, зөрчлөөс урьдчилан сэргийлэх ажилд идэвх зүтгэл гарган, гэмт хэрэг, зөрчлийг илрүүлэх, таслан зогсооход онцгой үүрэг гүйцэтгэсэн Сайншанд сумын Ерөнхий боловсролын 6-р сургуулийн 9А ангийн сурагч Э.Энх-Ерөөлт болон Х.Түвшинтөгөлдөр нарт аймгийн ИТХ-ын дарга Б.Ганзориг "Талархал" мөнгөн шагналыг гардуулж, сурлага хөдөлмөрийн өндөр амжилтыг хүсэн ерөөж шинэхэн төрсөн хүүхдүүдэд аймаг, орон нутгийн удирдлагуудын хамт төрсний гэрчилгээг гардуулж өглөө.

Олон улсын Хүүхдийн эрхийг хамгаалах өдөр буюу Хүүхдийн баярын өдрийг манай орон 71 дэх жилдээ тэмдэглэж байна. Анх 1925 онд “Женевт” хүүхдийн сайн сайхны төлөө дэлхийн чуулга уулзалт болж, тэрхүү чуулга уулзалтаас 6 дугаар сарын 1-ний өдрийг дэлхий нийтээрээ “Хүүхдийн эрхийг хамгаалах өдөр болгох уриалга гаргасан.

Улмаар 1951 онд Олон улсын ардчилсан эмэгтэйчүүдийн холбооноос хүүхдийн эрхийг хамгаалах өдрийг улс орон бүр тодорхой өдөр тэмдэглэж, хүүхэд багачуудаа баярлуулж байхаар шийдвэрлэсэн бөгөөд Монгол улс 1952 оноос эхлэн 6 дугаар сарын 1-ний өдрийг “Хүүхдийн баяр”-ын өдөр болгон тэмдэглэж ирсэн түүхтэй. Энэ жилийн хувьд “Олон улсын хүүхдийн эрхийг хамгаалах өдөр”ийг “Нэгдүгээрт Хүүхэд” уриан дор тэмдэглэн өнгөрүүлж байна.