Сайхандулаан сум  орон нутгийн хөгжлийн сангийн 229 сая төгрөгийн хөрөнгөөр шинээр ёслол хүндэтгэлийн өргөөг барьж ашиглалтад орууллаа. Энэхүү ёслол хүндэтгэлийн өргөө нь хоёр давхар байгууламж бөгөөд эхний давхартаа ахмадын танхим, номын сан, бусад үйл ажиллагаа явуулах нэмэлт өрөө тасалгаатай бол дээд давхарт олон нийтийн арга хэмжээ, хүлээн авалт зэрэг томоохон арга хэмжээ зохион байгуулж болох дугуй танхимтай аж. Энэ байгууламжийг ашиглалтад оруулснаар сумынхаа ард иргэдийн бүтээлч хөдөлмөр, идэвх оролцоог дэмжих, төрийн үйлчилгээг ойртуулах, ахмад буурлуудаа баярлуулах зэрэг төр хувийн хэвшлийн харилцааг ойртуулах, бүтээлч олон ажлыг өрнүүлэх боломжтой хэмээн сумын удирдлагууд өгүүлсэн юм. Тус сумын ЗДТГ-аас шинэ өргөөнийхөө нээлтийн үйл ажиллагааг есдүгээр сарын 30-нд зохион байгуулсан бөгөөд аймгийн ИТХ-ын дарга Г.Ганбаатар, Сайхандулаан сумаас сонгогдсон аймгийн ИТХ-ын төлөөлөгч Ж.Зоригтбаатар, сумын ИТХ-ын дарга Б.Эрдэнэжаргал, Засаг дарга Д.Баасанжав болон албаны хүмүүс, ард иргэдийн төлөөлөл оролцлоо. Аймгийн ИТХ-ын дарга Г.Ганбаатар “Сум орны хөгжил дэвшлийг хурдасгах, бүтээн байгуулах, хүн ардын амьдрах тав тухтай орчныг бүрдүүлэх, төрийн үйлчилгээг ойртуулах, тохижилт үйлчилгээг сайжруулахад аймаг, сумын зүгээс ихээхэн анхаарал хандуулж сүүлийн зургаан жилийн хугацаанд “Шинэ Дорноговь” хөтөлбөрийн хүрээнд Сайхандулаан суманд орон нутгийн төсөв болон ОНС-ийн хөрөнгө оруулалтаар томоохон бүтээн байгуулалтыг хийсэн. Тухайлбал, шинээр 50 хүүхдийн дотуур байр, 50 хүүхдийн цэцэрлэг, багийн төвүүд, ёслол хүндэтгэлийн өргөө, ингэний ферм, сумын ЗДТГ-ын барилга,соёлын төв, ахуйн үйлчилгээ гээд нийт 1 тэрбум 500 гаруй сая төгрөгийн хөрөнгө оруулалт хийлээ” гэсэн юм. Шинэ өргөөний нээлтийн арга хэмжээний үеэр сумын ЗДТГ-аас “Олон улсын ахмадын өдөр”-ийг тэмдэглэсэн төдийгүй сумынхаа 70 гаруй ахмад настан буурлуудад гарын бэлэг өгсөн юм. Мөн шилмэл малын  болон сүү цагаан идээний үзэсгэлэн худалдаа, уран сайханчдын урлагийн тоглолт болсон юм.