АРДЫН ИХ ХУРЛЫН ДЕПУТАТ АВАРГА МАЛЧИН НАТАРЫН ШАРАВ 1923 онд Завхан аймгийн Ургамал сумын нэгдүгээр багийн нутагт малчин ард Натарын 7-р хүү болон төрсөн. Н.Шарав 1944-1947 онд эх орноо хамгаалан эр цэргийн албаа хааж ирээд Сайхан, Хульжийн гол орчмоор нутаглаж, мал маллаж амьдрахын зэрэгцээ олон нийтийг удирдан зохион байгуулах ажилд оролцдог, нийгмийн идэвхи сайтай, ажил амьдралын арвин баялаг туршлагатай нэгэн байсан. 1958 онд Ургамал сумын “Коммунизмын туяа” нэгдэлд гэр бүлээрээ гишүүнээр элсч, тэмээ хариулан ажил үйлсээрээ шалгарч 1962 онд Шинийг санаачлагч, 1964-1966 онд сумын аварга малчин, 1963,1967,1971 онд Аймгийн аварга малчин болсон. Н.Шарав 1963 онд Ардын Их Хурлын тав дахь удаагийн сонгуулиар Хүнгий голын 150 дугаар тойргоос сонгогдон /одоогийн УИХ-ын гишүүнээр/ дөрвөн жил төрийн эрхийг барих үйл хэрэгт оролцож байсан. Н.Шарав хөдөө аж ахуйн салбараас тусгай шагналыг 40 гаруй удаа хүртсэн өвөрмөц амжилтын эзэн юм. 1963 онд төр засгаас Н.Шаравын хөдөлмөр зүтгэлийг үнэлж “Хөдөлмөрийн гавьяаны улаан тугийн одон”-гоор шагнасан. Н.Шарав 1959 онд Увс аймгийн Завхан сумын уугуул Дорлигийн Цэвэлмаатай гэр бүл болж долоон хүүхэд төрүүлж өсгөсөн. Н.Шарав, Д.Цэвэлмаа нар гэр бүлээрээ “Социалист хөдөлмөрийн бригад” байгуулан ажиллаж тэмээчдийн суу алдрыг нутаг усандаа дуурсгасан сум аймгийн олон удаагийн аварга малчид юм.

БНХАУ -ын Харбин хотод докторын зэрэг хамгаалсан нутгийн унаган охин Ганбаатарын Гантулга төлөөлөгчдөд Хувь хүний менежмент сэдвээр илтгэл тавив